पारगाव, ता. ३ : मांदळेवाडी (ता. आंबेगाव) येथील श्री हनुमान मंदिराच्या ३० व्या वर्धापन दिनानिमित्त श्री अखंड हरीनाम सप्ताह तथा ग्रंथराज ज्ञानेश्वर पारायण सोहळ्याचे आयोजन केले असून त्यानिमित्त शनिवार (ता. ४) ते शनिवार (ता. ११) पर्यंत कीर्तन महोत्सवाचे आयोजन केले असल्याची माहिती ग्रामस्थांनी एका प्रसिद्धी पत्रकाद्वारे दिली आहे.

या सप्ताह काळात दररोज पहाटे ४ ते ६ काकडा आरती, अखंड विना वादन, सकाळी ७ ते ११ ज्ञानेश्वरी पारायण, सकाळी ११ ते १२ गाथाभजन, सायंकाळी ५ ते ६ हरिपाठ व ७ ते ९ हरिकीर्तन, रात्री ९ ते १० महाप्रसाद व नंतर हरिजागर आदी कार्यक्रम आयोजित केले आहेत. शनिवार (ता. ४) संतोष महाराज मोरे (बीड), रविवार (ता. ५) एकनाथ महाराज चत्तर शास्त्री (जालना), सोमवार (ता. ६) ज्ञानेश्वर महाराज महाराज शिंदे (आळंदी), मंगळवार (ता. ७) कबीर महाराज आतार (खेड शिवापूर), बुधवार (ता. ८) पोपट महाराज पाटील (कासारखेड, जळगाव), गुरुवार (ता. ९) सुनील महाराज झांबरे (बीड), शुक्रवार (ता. १०) रोजी ग्रंथराज ज्ञानेश्वर दिंडी सोहळा व प्रदक्षिणा सायंकाळी साडेचार ते सात यादरम्यान होणार आहे. शुक्रवारी रात्री व शनिवारी (ता. ११) सकाळी साडे आठ वाजता दिगंबर महाराज नरवडे (आळंदी) यांचे काल्याचे कीर्तन होणार आहे. दररोज रात्री हरिकीर्तन संपल्यानंतर सर्वांसाठी महाप्रसादाचे आयोजन केले आहे.