पारगाव, ता. ११ : लोकसभा निवडणुकीच्या पार्श्वभूमीवर मतदान प्रक्रिया शांततेत व निपक्षपणे पार पडावी व आदर्श आचारसंहितेचे पालन व्हावे, यासाठी आंबेगाव तालुक्याच्या पूर्व भागात पारगाव (कारखाना) पोलिस ठाण्याच्या वतीने पारगाव, नागापूर व निरगुडसर या गावात पोलिसांनी संचलन केले.
शिरूर लोकसभा मतदारसंघासाठी सोमवार (ता. १३) रोजी मतदान होत आहे. त्या अनुषंगाने पारगाव कारखाना पोलिस ठाणे हद्दीतील गावांमध्ये मतदान प्रक्रिया शांततेत व निपक्षपणे पार पडावी व आदर्श आचारसंहितेचे पालन व्हावे यासाठी पारगाव कारखाना पोलिस ठाण्याचे पोलिस अधिकारी सहाय्यक पोलिस निरीक्षक नेताजी गंधारे यांच्या नेतृत्वाखाली पोलिस उपनिरीक्षक भाऊसाहेब लोकरे, पोलिस उपनिरीक्षक शरद घोडके व १२ पोलिस अंमलदार तसेच सीआयएसएफ (केंद्रीय औद्योगिक सुरक्षा दल) चे एक अधिकारी व १५ जवान, तीन वाहने यांनी काल शुक्रवारी सायंकाळी पारगाव, नागापूर व निरगुडसर या गावांमध्ये संचलन केले.