पारगाव, ता.६ : आंबेगाव तालुक्याच्या पूर्वभागातून पुणे-नाशिक औद्योगिक द्रुतगती महामार्ग क्रमांक ११ करिता भूसंपादनाची प्रक्रिया सुरू झाली आहे. याबाबत संबंधित विभागाचे वरिष्ठ अधिकारी व परिसरातील शेतकरी यांची बैठक शुक्रवारी (ता. ७) सकाळी ११ वाजता पारगाव येथील भीमाशंकर कारखाना येथे आयोजित केली आहे.

रेडीरेकनरचा दर वाढवून मिळत नाही तोपर्यंत शेतकरी जमिनी देणार नसल्याची भूमिका बाधित शेतकऱ्यांनी घेतली आहे. सहकारमंत्री दिलीप वळसे पाटील यांच्या सूचनेवरून बाधितांचे म्हणणे व तक्रारी ऐकून घेण्यासाठी तसेच महामार्गाबाबत सविस्तर माहिती बैठकीत दिली जाणार आहे. अशी माहिती खरेदी विक्री संघाचे माजी अध्यक्ष अनिल वाळुंज यांनी दिली.

बैठकीला पुणे-नाशिक औद्योगिक द्रुतगती महामार्गाचे भूसंपादन अधिकारी तथा उपविभागीय अधिकारी जुन्नर/आंबेगाव गोविंद शिंदे, उपजिल्हाधिकारी भूसंपादन विभाग कल्याण पांढरे, तहसीलदार संजय नागटीळक, उपाध्यक्ष विवेक वळसे पाटील, रामदास वळसे पाटील उपस्थित राहणार आहे. बैठकीस शेतकऱ्यांनी मोठ्या संख्येने उपस्थित राहावे, असे आवाहन वाळूंज यांनी केले आहे.