पारगाव ता. ५ : मेंगडेवाडी (ता. आंबेगाव) येथे शनिवारी सकाळी दहा वाजता अंत्यविधीसाठी जमलेल्या नागरिकांवर मधमाशांनी हल्ला केला. यामध्ये चार ते पाच जणांना मधमाशांनी जास्त प्रमाणात चावा घेतल्याने त्यांच्यावर निरगुडसर येथील ग्रामीण रुग्णालयात उपचार सुरू आहे.

मेंगडेवाडी येथील काशिनाथ बबन मेंगडे (वय ६८) यांचे शनिवारी पहाटे दीड वाजताच्या सुमारास दुःखद निधन झाले. त्यांचा अंत्यविधी कार्यक्रम मेंगडेवाडी येथील स्मशानभूमीत सकाळी दहा वाजता सुरू असताना अंत्यविधीप्रसंगी धुरामुळे झाडावर बसलेल्या आग्या मोहोळाच्या माशा उठल्या व त्यांनी जमलेल्या नागरिकांवर हल्ला केला. त्यावेळी एकच गोंधळ उडून नागरिक सैरावैरा पळू लागले. यात अनेक नागरिकांना मधमाशांनी चावा घेतला असून जास्त प्रमाणात चावा घेतलेल्या नागरिकांवर निरगुडसर येथील रुग्णालयात उपचार सुरू आहेत. यामध्ये वैभव कैलास मेंगडे (वय २८), विठ्ठल रामभाऊ मेंगडे (वय ८५), प्रणय ज्ञानेश्वर मेंगडे (वय २३), अक्षय नामदेव मेंगडे (वय २७), सुभाष पंढरीनाथ कुरकुटे (वय ५२) यांच्यावर निरगुडसर येथील ग्रामीण रुग्णालयात उपचार सुरू असून त्यांची प्रकृती ठीक असल्याचे डॉक्टरांनी सांगितले आहे.