पारगाव ता. २९ : पारगाव (ता.आंबेगाव) येथे अंगणात खेळणाऱ्या तीन वर्षांच्या मुलीवर भटक्या कुत्र्यांनी हल्ला केला. ही घटना बुधवारी (ता.२८) सायंकाळी पाच वाजताच्या दरम्यान घडली आहे. कुत्र्यांच्या हल्ल्यात बिनची विनोद चौधरी ही मुलगी जखमी झाली. तिला उपचारासाठी उपजिल्हा रुग्णालय मंचर या ठिकाणी दाखल केले आहे.
चौधरी कुटुंब कामानिमित्त पारगाव या ठिकाणी वास्तव्य करत असून, विनोद हे पारगाव येथे वेल्डिंगचे काम करतात. बिनची ही घराच्या बाहेर अंगणात खेळत असताना तेथे असलेल्या चार ते पाच कुत्र्यांच्या टोळक्याने तिच्यावर हल्ला करत तिच्या पाठीला, पायाला, गुडघ्याला चावा घेतला आहे. नशीब बलवत्तर म्हणून त्याचवेळी त्या ठिकाणावरून जाणाऱ्या तरुणांनी कुत्र्यांना हुसकवत मुलीला कुत्र्याच्या तावडीतून वाचवत कुटुंबीयांच्या स्वाधीन केले.
पारगाव या ठिकाणी गेल्या काही वर्षांपासून भटक्या कुत्र्यांचा मोठ्या प्रमाणात सुळसुळाट झाला असून गावात मुख्य बाजारपेठेत ये जा करणाऱ्या नागरिकांवर, लहान मुलांवर कुत्रे हल्ला करण्याच्या घटना घडत आहेत. गेल्या चार महिन्यात चार वेळा अशा घटना घडल्या आहेत. पारगाव हे तालुक्याच्या पूर्व भागातील मुख्य बाजारपेठ असलेले मोठे गाव असून या ठिकाणी चिकन, मटण, मत्स्य व्यवसाय करणारे दुकानदार, तसेच शाकाहारी, मांसाहारी हॉटेल व्यावसायिक मोठ्या प्रमाणात आहेत. चिकन, मटण माशांची वेस्टेज खाण्यासाठी कुत्री मोठ्या प्रमाणात भटकत असतात. मांसाहारी पदार्थ खाल्यानंतर कुत्रे आक्रमक होतात व येजा करणारे नागरिक, लहान मुलांवर हल्ला करतात त्यामुळे या कुत्र्यांचा बंदोबस्त करावा, अशी मागणी माजी उपसरपंच विठ्ठल ढोबळे यांनी केली आहे.
05673