पारगाव, ता. ८ : धामणी (ता. आंबेगाव) येथील श्री. शिवाजी विद्यालय व जिल्हा परिषद प्राथमिक शाळेतील विद्यार्थी तसेच, दहावी, बारावीच्या प्रथम तीन क्रमांकाने उत्तीर्ण, स्पर्धा परिक्षतील यशस्वी विद्यार्थ्यांचा सत्कार व गरजू विद्यार्थ्यांना शालोपयोगी वस्तूंचे वाटप करण्यात आले. आम्ही धामणीकर प्रतिष्ठान, ग्रामस्थ व माजी पंचायत समिती सदस्य रवींद्र करंजखेले यांच्या संकल्पनेतून या कार्यक्रमाचे आयोजन केले होते.
कार्यक्रमाच्या अध्यक्षस्थानी पांडुरंग महाराज बोऱ्हाडे होते. प्रमुख पाहुणे म्हणून पारगाव कारखाना पोलिस ठाण्याचे सहाय्यक पोलिस निरीक्षक नेताजी गंधारे, वनपरिक्षेत्र अधिकारी विकास भोसले आदी उपस्थित होते. प्राचार्य मारुती सोमवंशी यांनी प्रास्ताविक; तर करंजखेले यांनी स्वागत केले. शाळा समिती सदस्य रामदास जाधव, जिल्हा परिषद शाळेच्या मुख्याध्यापिका अनुराधा कथले, नामदेव वाकचौरे यांनी मनोगत व्यक्त केले. आयटी इंजिनिअर गणेश बोऱ्हाडे, माजी ग्रामपंचायत सदस्या पूजा जाधव, करंजखेले यांच्या वतीने विद्यार्थ्यांना शालोपयोगी वस्तु देण्यात आल्या. माजी सरपंच सागर जाधव यांनी आभार मानले.