पारगाव, ता. २६ : आंबेगाव तालुक्याच्या पूर्व भागातील गावात मागील दोन दिवसांत बिबट्याच्या हल्ल्यात सात वेगवेगळ्या घटनांत घडल्या. यामध्ये एक शेळी, एक कालवड, एक वासरू, दोन मेंढी, एक शिंगरू असे एकूण सहा पाळीव प्राणी ठार तर एक वासरू जखमी झाले आहे.
काठापूर बुद्रुक येथील भीमा शिंगटे या मेंढपाळाच्या वाड्यावर बिबट्याने हल्ला करून एक मेंढी ठार केली. पोंदेवाडी येथील सतीश करंडे यांचीही एक मेंढी बिबट्याच्या हल्ल्यात मृत झाली. लाखणगाव येथील एकनाथ रोडे यांच्या गोठ्यातील वासरावर बिबट्याने हल्ला करून जखमी केले आहे. पारगाव येथील केरू माने यांच्या वाड्यावर बिबट्याने हल्ला करून घोड्याचे शिंगरू ठार केले आहे.
पहाडदरा येथील गोविंद दिलीप वाघ यांची एक शेळी व जयदीप बाळासाहेब वीर यांची एक कालवड बिबट्याच्या हल्ल्यात ठार झाली आहे. मांदळेवाडी येथील बाळू रामभाऊ गव्हाणे यांच्या गोठ्यावर बिबट्याने केलेल्या हल्ल्यात वासरू ठार झाले आहे.
मंचर वनपरिक्षेत्र अधिकारी विकास भोसले यांच्या मार्गदर्शनाखाली वनपाल नीलम चव्हाण, वनरक्षक पूजा कांबळे, वनरक्षक योगेश निघोट, वनरक्षक अस्मिता शिंदे यांनी बिबट्याचे हल्ले झालेल्या घटनास्थळी भेट देऊन पंचनामे केले आहे.