पारगाव, ता. ४ : लोणी (ता. आंबेगाव) येथे किरकोळ कारणावरून झालेल्या भांडणातून डोक्यात दगड मारल्याने गंभीर जखमी झालेल्या किसन रघुनाथ वाघ (वय ७२, रा. पहाडदरा, ता. आंबेगाव) यांचा सोमवारी (ता. ३) पहाटे पुणे येथील रुग्णालयात उपचारादरम्यान मृत्यू झाला.
लोणी गावाच्या हद्दीत रॉयल हॉटेलमध्ये १७ ऑक्टोबर रोजी दुपारी एक वाजण्याच्या सुमारास किसन रघुनाथ वाघ व शांताराम नामदेव गार्डी (रा. चिंचबाईवाडी, ता. खेड) हे दोघे मित्र जेवण करण्यासाठी थांबले होते. यावेळी संतोष ऊर्फ चंकी रमेश जाधव (वय २८, रा. धामणी, ता. आंबेगाव) हा वाघ व गार्डी यांच्याजवळ जाऊन वाद घालत शिवीगाळ करून दमदाटी केली. तसेच, हातात आणलेला दगड वाघ यांच्या डोक्यात दोनदा मारून गंभीर जखमी केले. वाघ यांना प्रथम मंचर येथील रुग्णालय व त्यानंतर पुणे येथील रुग्णालयात उपचारासाठी हलविण्यात आले. सुमारे १९ दिवस त्यांची मृत्यूशी सुरू असलेली झुंज अपयशी ठरली. सोमवारी पहाटे उपचार सुरू असताना त्यांचा मृत्यू झाला. शांताराम नामदेव गार्डी यांनी दिलेल्या फिर्यादीवरून संतोष ऊर्फ चंकी रमेश जाधव यास २४ ऑक्टोबर रोजी पारगाव कारखाना पोलिसांनी अटक करून न्यायालयात हजर केले असता त्याला १४ दिवसांची न्यायालयीन कोठडी सुनावण्यात आली. त्याच्यावर गुन्हा दाखल केला आहे. पुढील तपास सहाय्यक पोलिस निरीक्षक नेताजी गंधारे यांच्या मार्गदर्शनाखाली पोलिस उपनिरीक्षक भाऊसाहेब लोकरे करत आहे.
किसन वाघ यांनी पहाडदरा सहकारी सोसायटीचे चार वर्ष अध्यक्ष, तसेच १८ वर्ष संचालक म्हणून काम पहिले आहे. वाघ यांचा पहाडदरा, धामणी, शिरदाळे परिसरातील धार्मिक, तसेच सामाजिक कामात सदैव सहभाग असायचा त्यांच्या मृत्यूने परिसरात हळहळ व्यक्त केली जात आहे.

06297