पारगाव, ता. १० : जारकरवाडी (ता. आंबेगाव) येथील विकास सोसायटीने ४९५ सभासदांना पुणे जिल्हा बँकेमार्फत खरीप हंगामासाठी ४ कोटी १२ लाख ५० हजार ५०० रुपयांचे पीककर्ज वाटप केले आहे, अशी माहिती अध्यक्ष खंडू भोजने यांनी दिली. आमदार दिलीप वळसे पाटील यांच्या मार्गदर्शनाखाली आणि जिल्हा बँकेच्या अधिकाऱ्यांच्या सहकार्याने हे वाटप पूर्ण झाले. दरम्यान, शासनाच्या पुण्यश्लोक अहिल्यादेवी होळकर कर्जमाफी योजनेचे परिपत्रक अद्याप न मिळाल्याने कर्जदारांमध्ये संभ्रमाचे वातावरण आहे. यामुळे संस्थेच्या वसुलीवर परिणाम झाला असून, शासनाने तातडीने परिपत्रक जाहीर करावे, अशी मागणी उपाध्यक्ष बाळासाहेब लबडे व संचालकांनी केली आहे. यावेळी जिल्हा बँकेचे विभागीय अधिकारी विष्णू गायकवाड, विकास अधिकारी के.आर. वाळुंज व कर्मचारी उपस्थित होते.