पारगाव, ता. २२ : जारकरवाडी (ता. आंबेगाव) येथील विकास सोसायटीने ४९५ सभासदांना पुणे जिल्हा बँकेमार्फत खरीप हंगामासाठी ४ कोटी १२ लाख ५० हजार रुपयांचे पीककर्ज वाटप केले. मात्र, कर्जमाफीच्या शासन निर्णयाअभावी वसुलीवर परिणाम झाला आहे. पुण्यश्लोक अहिल्यादेवी होळकर कर्जमाफी योजनेचे परिपत्रक अद्याप सोसायट्यांना न मिळाल्याने सभासदांमध्ये संभ्रमाचे वातावरण आहे. यामुळे संस्थेच्या वसुलीच्या टक्केवारीत मोठी घसरण झाली आहे. शासनाने या योजनेचे परिपत्रक तातडीने जाहीर करावे, अशी मागणी संस्थेचे अध्यक्ष खंडू भोजने व उपाध्यक्ष बाळासाहेब लबडे यांनी केली आहे. आमदार दिलीप वळसे पाटील यांच्या मार्गदर्शनाखाली हे कर्जवाटप करण्यात आले. यावेळी जिल्हा बँकेचे विभागीय अधिकारी विष्णू गायकवाड, विकास अधिकारी के. आर. वाळुंज, सचिव नवनाथ मंचरे उपस्थित होते.