आपटाळे, ता. २३ : चिंचोली काशिद (ता.जुन्नर) येथे सनई-ताशा, डीजे, गुलाल व फुलांच्या उधळणीत हिंदू मुस्लिम शेतकरी बांधवांनी बैलांप्रती कृतज्ञता व्यक्त केली व श्रावणी बैलपोळा उत्साहात साजरा करण्यात आला. हिंदू मुस्लिम बांधवांनी एकत्रित बैलपोळा साजरा करण्याची परंपरा यावर्षीही सुरू ठेवल्याने ग्रामस्थांनी या उत्सवातून सर्वधर्मसमभावाची भावना जागृत ठेवली.
श्रावणी बैलपोळानिमित्त दुपारी तीन वाजता सनई-ताशांच्या निनादात मिरवणुकीला सुरुवात झाली. पारंपरिक पोशाखातील शेतकरी व हार, तुरे, फुगे, रिबिनी यांनी सजविलेले बैल याने मिरवणुकीची शोभा वाढली. गावातील महिला, युवक व लहान मुलांचा यात मोठ्या संख्येने सहभाग होता. संध्याकाळी डीजेच्या दणदणाटात व फुलांच्या उधळणीसह संपूर्ण गावातून बैलांची मिरवणूक काढण्यात आली. जवळपास दोन तासाहून अधिक मिरवणूक चालली.
यावेळी सरपंच खंडू काशिद, समर्थ मराठा समाज मंदिर ट्रस्टचे अध्यक्ष नवनाथ काशिद, उपसरपंच इम्रान चौगुले, माजी सरपंच उत्तमराव काशिद, पोलिस अधिकारी रोहिदास वाजे, विलास खराडे, सदस्य सचिन खराडे, इसाक चौगुले, सुरेश काशिद, संकेत टेमगिरे, राम पानसरे, नजीर शेख, आरिफ पटेल, दीपक काशिद, शहाजी खराडे यांसह ग्रामस्थ मोठ्या संख्येने उपस्थित होते.