आपटाळे, ता. २९ ः जुन्नर शहरातील परदेशपुरा येथे पत्नीचा खून केल्याप्रकरणी पतीला अटक करण्यात आली असल्याची माहिती पोलिस निरीक्षक किरण अवचर यांनी दिली. या घटनेची फिर्याद प्रीतम कुमार वशिष्ट प्रसाद यांनी जुन्नर पोलिस ठाण्यात दिली. याबाबत सविस्तर माहिती अशी की, परदेशपुरा येथे मजुरीच्या कामानिमित्ताने उत्तर प्रदेश येथील चंद्रशेखर रामबचन प्रसाद हा पत्नीसह वास्तव्यास होता. बुधवारी (ता. २९) सकाळी सात वाजण्याच्या सुमारास कौटुंबिक कारणावरून झालेल्या भांडणामुळे पती चंद्रशेखर प्रसाद याने पत्नी प्रतिमादेवी चंद्रशेखर प्रसाद (वय २८) यांना जिना चढत असताना त्यांच्या केसाला धरून ओढून फरशीवर आदळून जखमी केले. यामध्ये प्रतिमादेवी या गंभीर जखमी झाल्याने त्यांचा मृत्यू झाला. जुन्नर पोलिसांनी चंद्रशेखर रामबचन प्रसाद (मुळ रा. सरबोली डुमवलिया, जि. देवरिया, उत्तर प्रदेश, सध्या रा. परदेशपुरा, जुन्नर) याला अटक केली आहे.