आपटाळे, ता. १३ : येणेरे (ता. जुन्नर) येथील श्री छत्रपती हायस्कूलमधील स्वरूप नितीन केदार या इयत्ता आठवीमध्ये शिकणाऱ्या विद्यार्थ्याचे १ ऑक्टोबर रोजी सर्पदंशाने निधन झाले होते. या विद्यार्थ्यांच्या पालकाला विमा कंपनीकडून पन्नास हजार रुपयांचा विमा मंजूर झाला होता. विमा रकमेचा धनादेश पालकांकडे वितरित केला, अशी माहिती मुख्याध्यापक सखाराम पुंडे यांनी दिली.
पुणे जिल्हा शिक्षण मंडळाच्या शाळांमध्ये शिक्षण घेणारे विद्यार्थी व शिक्षक यांचा दरवर्षी विमा उतरवला जातो. यावर्षी येणेरे येथील श्री छत्रपती हायस्कूलमधील ३६८ विद्यार्थ्यांच्या विम्याची रक्कम सरपंच अमोल भुजबळ यांनी दिली होती. गेल्या दोन वर्षांपासून त्यांच्या माध्यमातून विद्यार्थ्यांचा विमा उतरवला जात आहे. या शैक्षणिक वर्षामध्ये शाळेच्या इयत्ता आठवीमध्ये शिकणाऱ्या स्वरूप नितीन केदार या विद्यार्थ्याचे सर्पदंशाने निधन झाले होते. विमा कंपनीकडून त्याच्या पालकांना पन्नास हजार रुपयांचा विमा मंजूर झाला होता. विम्याचा धनादेश गटशिक्षणाधिकारी अशोक लांडे व सरपंच भुजबळ यांच्या हस्ते पालकांकडे सुपूर्त केला. याप्रसंगी केंद्रप्रमुख शिवाजी गवारी, गुलाब ढोले, ज्ञानेश्वर जोशी, ग्रामविकास अधिकारी रवींद्र मलघे, प्रमोद मुळे, विष्णू आहेर आदी उपस्थित होते.