जुन्नर, ता. १६ : जुन्नर तालुक्यात जिल्हा परिषद व पंचायत समितीच्या पंचवार्षिक निवडणुकीसाठी पहिल्याच दिवशी एकूण ८६ नामनिर्देशन पत्र इच्छुक उमेदवारांकडून घेण्यात आल्याची माहिती निवडणूक निर्णय अधिकारी डॉ. स्वप्निल मोरे व सहायक निवडणूक निर्णय अधिकारी डॉ. सुनील शेळके यांनी दिली.
जिल्हा परिषद व पंचायत समितीच्या पंचवार्षिक निवडणुकीसाठी शुक्रवारापासून (ता. १६) उमेदवारांना नामनिर्देशन पत्र देण्यास सुरुवात झाली. नामनिर्देशन पत्रे देणे अथवा स्वीकारणे ही प्रक्रिया जुन्नर तालुका पंचायत समितीच्या कार्यालयात सुरू राहणार आहे.
उमेदवारी अर्ज घेण्यासाठी तालुका पंचायत समितीच्या आवारात विविध पक्षाच्या इच्छुक उमेदवार व कार्यकर्त्यांची मोठी गर्दी पाहावयास मिळाली.
तालुक्यातील काही गटांमध्ये इच्छुक उमेदवारांची आपापल्या पक्षांकडे उमेदवारी मिळवण्यासाठी धावपळ सुरू असल्याचे चित्र दिसून येत आहे. काही गटांमध्ये राजकीय पक्षांना अपेक्षित उमेदवार भेटण्यासाठी शोधाशोध करावी लागत असल्याचे चित्र आहे. यामुळे एखाद्या गटात उमेदवारीसाठी रस्सीखेच तर एखाद्या गटात उमेदवाराची पळवापळव केली जाण्याची शक्यता वर्तवली जात आहे. काही राजकीय पक्षाच्या वरिष्ठांनी एकापेक्षा अधिक उमेदवारांबाबत वेट अँड वॉचची भूमिका घेतल्याने उमेदवारांमध्ये संभ्रम निर्माण झाला आहे.