बावडा, ता. ४ : बावडा (ता. इंदापूर) येथे ऊस उत्पादकांसाठी शनिवारी (ता. ६) सायंकाळी सहा वाजता बाजारतळ पटांगणावर शेतकरी मेळाव्याचे आयोजन केले आहे.
ऊस उत्पादक शेतकऱ्यांना साखर कारखान्यांनी योग्य, रास्त व न्याय्य एफ आरपीची पहिली उचल द्यावी व ऊसदराबाबत शेतकऱ्यांवर कोणताही अन्याय होऊ नये, यासाठी शेतकरी संघर्ष समितीने पुढाकार घेतला आहे.
मेळाव्यास शेतकरी नेते रघुनाथ दादा पाटील, लक्ष्मणराव वडले, शिवाजीराव नांदखिले हे मार्गदर्शन करणार आहेत, अशी माहिती विजय गायकवाड, पंडितराव पाटील, तुकाराम घोगरे यांनी दिली. मेळाव्यात शेतकरी संघर्ष समिती, शेतकरी संघटना (राजू शेट्टी), शरद जोशी विचार मंचचा समावेश आहे तरी या मेळाव्यास शेतकरी बांधवांनी उपस्थित राहावे,, असे आयोजकांच्या वतीने आवाहन करण्यात आले आहे.
दरम्यान, ऊस उत्पादकांची पिळवणूक करून कारखानदाराने स्वतःचे खिसे भरू नयेत यासाठी शेतकऱ्यांनी स्वतः आपल्या न्याय्य व कायदेशीर हक्कासाठी सतर्क, सावध व जागरूक राहावे, असे आवाहन आयोजकांनी केले आहे.