भुकूम, ता. २१ : जवळ (ता. मुळशी) येथील आदिवासी विद्यार्थ्यांचे केस कापण्याची सोय करून सरपंच उज्ज्वला घारे यांनी स्वच्छतेचा संदेश देत अनोखा उपक्रम राबविला.
येथील प्राथमिक शाळेत पंचवीस आदिवासी-कातकरी विद्यार्थी आहेत. त्यांची आर्थिक परिस्थिती अतिशय कठीण आहे. परिस्थितीमुळे विद्यार्थ्यांना केस कापणेही परवडत नाही. तसेच चांगले कपडेही नसतात. त्यामुळे सरपंच घारे यांनी नाभिक बोलावून विद्यार्थ्यांचे केस कापले. तसेच त्यांना स्वच्छतेचे किट, गणवेश, बूट, दप्तर आदी शैक्षणिक साहित्य दिले. या उपक्रमासाठी झालेला सर्व खर्च त्यांचे पती युवा सेनेचे जिल्हाध्यक्ष नीलेश घारे यांनी केला. या वेळी ग्रामपंचायत सदस्य संदीप सुपेकर, शरद घारे, संभाजी घारे, नाना घारे, नथू घारे, बापूराव घारे, जयसिंग घारे आदी उपस्थित होते.