भुकूम, ता. २७ : शासनाने गायीच्या दूध खरेदीस तेहतीस रुपये प्रतिलिटर जाहीर केला होता. त्याची कोणतीच कार्यवाही झाली नाही. हा दर कमी असून, शासनाने चाळीस रुपये दर करावा, अशी मागणी मुळशी तालुक्यातील दूध व्यावसायिकांनी केली आहे.
तालुक्यात गायीच्या दुधाचे उत्पादन प्रतिदिन किमान दहा हजार लिटर आहे. अनेक खासगी व सहकारी व्यावसायिक शेतकऱ्यांकडून अठ्ठावीस रुपये लिटरने दूध खरेदी करतात. तसेच ग्राहकांना साठ रुपये लिटरपर्यंत विकले जाते. यामध्ये दूध उत्पादक शेतकऱ्यांना मोठा तोटा सहन करावा लागतो. तसेच पशू खाद्य व गाईंचे दर मोठ्या प्रमाणावर वाढले आहेत. तसेच दूध उत्पादनासाठी अतिशय कष्ट असतात. त्यामुळे हा व्यवसाय परवडत नाही असे दूध उत्पादक अमित भोसले, नीलेश शिंदे, योगेश तावरे, कैलास शिंदे यांनी सांगितले. शासनाने गायीच्या दुधास किमान चाळीस रुपये प्रती लिटर दर करावा, अशी दूध उत्पादकांची मागणी आहे.
दरम्यान, तालुक्यातील शेतकरी तरुणांनी गायीचा दूध व्यवसाय करण्यासाठी जिल्हा उद्योग केंद्राकडून प्रकल्प मंजूर केले आहेत.