भुकूम, ता. ५ : घोटावडे ते चाले (ता. मुळशी) रस्त्यासाठी ‘पीएमआरडीए’कडून ३९ कोटी रुपये निधी मंजूर झाला आहे. पाच किलोमीटरचा हा रस्ता सिमेंट कॉंक्रिटचा होणार आहे, अशी माहिती आमदार शंकर मांडेकर यांनी दिली.
मुळशी तालुक्यातील कोळवण खोऱ्यातील ग्रामस्थांना पिंपरी चिंचवडला जाण्यासाठी हा रस्ता सोयीचा आहे. तसेच, पूर्व भागातील हिंजवडी, माण, मारूंजी, तसेच पिंपरी चिंचवड परिसरातील ग्रामस्थांना तालुक्याच्या ठिकाणी पौड येथे जाण्यासाठी हा रस्ता सोयीचा आहे. तसेच, कोकणात पौड मार्गे जाण्याकरिता जवळचा आहे. टेकड्यांच्या पायथ्याने रस्ता असल्यामुळे पावसाळ्यात रस्त्यावर पाण्यामुळे नेहमी खड्डे पडले जातात. रस्त्यामुळे भेगडेवाडी, आमलेवाडी, मुगावडे, चाले गावांची सोय होणार आहे. चांगला रस्ता झाल्यावर घोटावडे फाटा येथील वाहतूक कोंडीचा ताण कमी होईल.