भिगवण, ता. ३ : डिकसळ (ता. इंदापूर) येथून कत्तलीसाठी अवैधरीत्या घेऊन जात असलेल्या दोन गायींची पोलिस प्रशासनाने सुटका केली आहे. याप्रकरणी गायींची वाहतूक करणाऱ्या चालकाविरुद्ध येथील भिगवण पोलिस ठाण्यामध्ये गुन्हा दाखल केला आहे.
याप्रकरणी लहू दत्तात्रेय जगताप (वय ४९, रा. खडकी, ता. दौंड) याच्याविरुद्ध येथील भिगवण पोलिस ठाण्यामध्ये गुन्हा दाखल केला आहे. याबाबत पोलिसांनी दिलेली माहिती अशी की, डिकसळ (ता. इंदापूर) येथून मंगळवारी (ता. ३) सकाळी सहाच्या सुमारास गाडीतून चालक लहू दत्तात्रेय जगताप हा गोवंशाच्या वाहतुकीला परवानगी नसताना अवैधरीत्या दोन गायी त्यांच्या चारा-पाण्याची कोणतीही सोय न करता कत्तल करण्यासाठी राशीन (ता. कर्जत, जि. अहमदनगर) येथे विक्री करण्यासाठी घेऊन जात असताना आढळून आला. याप्रकरणी पोलिसांनी चालकाविरुद्ध गुन्हा दाखल केला. त्याच्याकडून गाडी व दोन गायी अंदाजे किंमत दोन लाख २० हजार रुपये, असा मुद्देमाल जप्त केला आहे. अधिक तपास येथील भिगवण पोलिस ठाण्याचे सहाय्यक पोलिस निरीक्षक विनोद महांगडे यांच्या मार्गदर्शनाखाली भिगवण पोलिस करीत आहेत.