भिगवण, ता. २७ : दरवर्षी पावसाळा आला की तुंबलेल्या गटारांची तात्पुरती दुरुस्ती असे चित्र मागील बारा वर्षापासून भिगवणकर पाहत आले आहेत. गटारे तुंबण्याच्या समस्येवर आत्ता केवळ मलमपट्टी नको तर या समस्येवर कायमस्वरूपी तोडगा काढण्याची मागणी भिगवणकरांकडून करण्यात येत आहे.

भिगवणच्या पश्चिम भागातून येणाऱ्या पावसाच्या पाण्यास योग्य दिशा दिल्यामुळे सर्व पाणी सेवा रस्त्यावर भिगवण बस स्थानक व तेथून थेट थोरात नगरमधील घरांमध्ये शिरल्यामुळे येथील घरांचे मोठे नुकसान झाले आहे. उपमुख्यमंत्री अजित पवार व क्रीडामंत्री दत्तात्रेय भरणे यांनी सूचना केल्यानंतर सोमवारपासून (ता.२६) तुंबलेली गटारे स्वच्छ करण्याचे काम सुरू केले आहे. परंतु केवळ तुंबलेली गटारे मोकळी करण्यापेक्षा गटारांमध्ये पाणी योग्य पद्धतीने सामावून घेण्यासाठी व राष्ट्रीय महामार्गाच्या पश्चिम भागातील पाण्याला योग्य दिशा देण्याची आवश्यकता आहे.

राष्टीय महामार्गाच्या सेवा रस्त्याच्या दोन्ही बाजूला गटारे असूनही ती सातत्याने तुंबलेली असल्यामुळे गटारांच्या बाजूने सेवा रस्त्यावरून वाहणारे घाण पाणी, रस्त्याच्या दोन्ही सेवा रस्त्याच्या बाजूला असलेले कचऱ्याचे ढीग, असे चित्र येथे दिसत आहे. राष्ट्रीय महामार्गाच्या संपूर्ण दोन किलोमीटर परिसरामध्ये कोठेही स्वच्छता गृह नसल्यामुळे या भागांमध्ये घाणीचे साम्राज्य दिसून येते तर भिगवण व मदनवाडी येथील उड्डाण पुलाच्या खाली परिसराची योग्य निगा राखली जात नसल्यामुळे सदर परिसराचा उपयोग नागरिकांकडून स्वच्छतागृहासारख्या करण्यात येत असल्यामुळे सदर परिसरामध्ये दुर्गंधी पसरली आहे.

सध्या राष्ट्रीय महामार्ग प्रशासनाकडून तात्पुरती मलमपट्टी करण्याचा प्रयत्न होत आहे. त्यामुळे हा प्रश्न सुटणार नाही. राष्ट्रीय महामार्गाच्या पश्चिम बाजूकडील पाण्याचे योग्य व्यवस्थापन तसेच गटारांना योग्य उतार देण्याची आवश्यकता आहे त्याशिवाय हा प्रश्न कायमस्वरूपी सुटणार नाही.
- रामचंद्र कदम, नागरिक

01128