भिगवण, ता. १३ : पुणे- सोलापूर राष्ट्रीय महामार्गावर डाळज क्र. २ (ता. इंदापूर) येथे एका मद्यधुंद प्रवाशाने चालत्या एसटी बसमध्ये धिंगाणा घालत बसच्या वाहक व प्रवाशांना शिवीगाळ व दमबाजी केली. या प्रकरणी वाहकाने संबंधित प्रवाशांविरुद्ध येथील भिगवण पोलिस ठाण्यामध्ये तक्रार दाखल केली आहे.
या प्रकरणी एसटी बसचे वाहक विजयकुमार बापूराव वडगावे (वय ४७, उमरगा आगार, जि. धाराशिव) यांनी तक्रार दाखल केली आहे. त्यावरून प्रवासी दिगंबर पांडुरंग जावकरे (वय ४७, रा. नंदूर, ता. देगलूर, जि. नांदेड) यांच्याविरूद्ध गुन्हा दाखल केला आहे.
याबाबत भिगवण पोलिसांनी माहिती दिली की, फिर्यादी उमरगा ते पुणे एसटी बस (क्र. एम.एच.१४-०६३८) घेऊन जात असताना एसटीमधील प्रवासी दिगंबर पांडुरंग जावकरे याने दारूच्या नशेमध्ये वाहकासोबत, तसेच बसमधील महिला व चार- पाच पुरुष प्रवाशांसोबत वाद घालून शिवीगाळ व दमबाजी केली. त्यातून सार्वजनिक शांततेचा भंग केला. सदर प्रवाशाची येथील ग्रामीण रुग्णालयामध्ये तपासणी केली असता त्याने मद्य प्राशन केले असल्याचा अहवाल वैद्यकीय अधिकाऱ्यांनी दिला आहे.
या प्रकरणी सदर प्रवाशांविरुद्ध येथील भिगवण पोलिस ठाण्यामध्ये गुन्हा दाखल केला आहे.