भिगवण, ता. १ : ‘‘उच्च शिक्षणामध्ये ग्रामीण भागातील मुला- मुलींचे प्रमाण वाढत आहे, ही समाधानाची बाब आहे. ग्रामीण भागातील मुलांमध्ये कष्ट करण्याची प्रचंड क्षमता असते. उच्च शिक्षणाच्या विविध अभ्यासक्रमासाठी प्रवेश घेतलेल्या ग्रामीण भागातील मुला-मुलींनी ध्येय निश्चित करून प्रामाणिक प्रयत्न केल्यास यशाचा मार्ग निश्चित सुकर होईल,’’ असा आशावाद प्रमुख वक्ते गणेश शिंदे यांनी व्यक्त केला.
स्वामी चिंचोली (ता. दौंड) येथील दत्तकला शिक्षण संस्थेमधील विविध अभ्यासक्रमांच्या विद्यार्थ्यांच्या स्वागत समारंभामध्ये शिंदे बोलत होते. कार्यक्रमाच्या अध्यक्षस्थानी दत्तकला शिक्षण संस्थेचे अध्यक्ष प्रा. रामदास झोळ होते. यावेळी संस्थेच्या सचिव माया झोळ, संचालक प्रा. श्रीकांत साळुंके, प्राचार्य डॉ. एस. ए. पाटील, डॉ. विशाल बाबर आदी उपस्थित होते.
अध्यक्ष प्रा. झोळ म्हणाले की, ‘‘दत्तकला शिक्षण संस्था ही नेहमीच विद्यार्थ्यांच्या सर्वांगीण शैक्षणिक प्रगतीसाठी प्रयत्नशील राहिली आहे. उत्कृष्ट शिक्षक, अत्याधुनिक प्रयोगशाळा व संशोधनाची नानाविध संधी संस्थेने उपलब्ध करून दिल्या आहेत.’’
यावेळी दत्तकला शिक्षण संस्थेच्या दत्तकला ग्रुप ऑफ इन्स्टिट्यूशन्स या महावि‌द्यालयातील पदवी अभियांत्रिकी, पदविका अभियांत्रिकी, एम.बी.ए., एम.सी.ए. या अभ्यासक्रमासाठी प्रथम वर्षामध्ये प्रवेश घेतलेल्या विद्यार्थ्यांचे वरिष्ठ वर्गातील विद्यार्थ्यांना गुलाब पुष्प देऊन स्वागत केले.
यावेळी माया झोळ यांनी मनोगत व्यक्त केले. शिवानी बिडवे व सृष्टी अहिरे यांनी प्रास्ताविक व सूत्रसंचालन केले. डॉ. नरेश घोरपडे यांनी आभार मानले. कार्यक्रमासाठी प्राध्यापक शिक्षकेत्तर कर्मचारी व विद्यार्थी यांनी विशेष परिश्रम घेतले.