भिगवण, ता. २३ : मदनवाडी (ता. इंदापूर) गावातील अनेक विद्यार्थी-विद्यार्थिनी स्पर्धा परीक्षांची तयारी करत आहेत, परंतु सुविधांच्या अभावामुळे विद्यार्थ्यांना अभ्यास करत असताना अडचणी येत आहेत. विद्यार्थ्यांची अडचण लक्षात घेऊन गावासाठी अद्ययावत संदर्भ ग्रंथ आणि पोषक फर्निचर असलेली ‘डिजिटल अभ्यासिका’ उभारण्यासाठी निधी मंजूर करावा, अशी मागणी करण्यात आली आहे.
राज्याचे सांस्कृतिक कार्यमंत्री आशिष शेलार नुकतेच कामानिमित्त भिगवण येथे आले होते. त्यावेळी इंदापूर तालुका भाजपचे अध्यक्ष तेजस देवकाते यांनी सांस्कृतिक कार्यमंत्री शेलार यांच्याकडे निवेदनाद्वारे ही मागणी केली. देवकाते यांनी दिलेल्या निवेदनानुसार मदनवाडी गावातील अनेक विद्यार्थी स्पर्धा परीक्षांची तयारी करत आहेत, परंतु सुविधांच्या अभावामुळे विद्यार्थ्यांना अडचणी येत आहेत, तसेच गावांमध्ये भजन व कीर्तनाचीही परंपरा आहे त्यासाठी सांस्कृतिक सभागृहाची आवश्यकता आहे. ‘‘विद्यार्थ्यांसाठी अभ्यासिका व सांस्कृतिक वारसा जपण्यासाठी सांस्कृतिक सभागृह मंजूर करावे,’’ अशी मागणी देवकाते यांनी केली आहे. याबाबत सांस्कृतिक कार्यमंत्री शेलार यांनी सकारात्मक प्रतिसाद दिला आहे.