भोर, ता. ६ : भाटघर धरण परिसरातील वाढाणे (ता.भोर) येथे एसटी बस गटारा शेजारील खड्ड्यात खचल्याने अपघात झाला. यामुळे तीन-चार प्रवासी जखमी झाले. हा अपघात बुधवारी (ता.६) दुपारी तीनच्या सुमारास झाला. भोर आगारातून भोर-मळे एसटी मार्गस्थ झाली. या बसमध्ये वाहनचालक सिध्दार्थ अडसूळ आणि वाहक अश्विनी जाधव यांच्यासह सुमारे ४४ प्रवासी होते. दरम्यान, दुपारी तीनच्या सुमारास वाढाणे येथील वळणावर एसटी गटाराच्या बाजूला असलेल्या खड्यात घसरली आणि तिरक्या पद्धतीने डाव्या बाजूला खचली. त्यामुळे दरवाजा बंद झाला. परंतु चालक व प्रवासी यांनी चालकाचा आणि संकटकालीन दरवाजा उघडून सर्वांना बाहेर काढले. फक्त तीन-चार प्रवाशांना किरकोळ दुखापत झाली. अपघाताची माहिती मिळताच आगार व्यवस्थापक प्रवीण बांद्रे यांनी तातडीने दुसरी बस पाठवून प्रवाशांना इच्छित स्थळी सोडण्याची व्यवस्था केली. दरम्यान, सायंकाळी उशिरापर्यंत अपघातग्रस्त एसटी बाहेर काढण्याचे काम सुरू होते.
.................
01924