भोर, ता. २ : शासकीय कार्यालयात शासकीय शुल्काव्यतिरीक्त इतर बाबींची किंवा लाचेची मागणी होत असेल, तर नागरिकांनी त्वरित लाचलुचपत विभागाशी संपर्क साधावा, असे आवाहन प्रशासनाकडून करण्यांत आले. शासनाच्या दक्षता जनजागृती सप्ताहानिमित्त मंगळवारी (ता. ३१) आठवडे बाजाराच्या दिवशी शहरात शासनाच्या वतीने जनजागृती करण्यात आली.
शहरातील तहसील, पंचायत समिती, नगरपालिका आदी कार्यालयांच्या परिसराबरोबर आठवडे बाजार, राजवाडा चौक व एसटी स्टॅंड या सार्वजनिक ठिकाणी जनजागृती केली. पुण्याच्या लाचलुचपत प्रतिबंधक विभागाचे पोलिस निरीक्षक श्रीराम शिंदे, पोलिस हवालदार एस. ए. काकडे व सौरभ महाशब्दे यांनी याबाबत नागरिकांना माहिती दिली. सर्वसामान्य नागरिकांना कोणताही शासकीय कर्मचारी अथवा लोकसेवक शासकीय काम करून देण्याकरता शासकीय शुल्का व्यतिरिक्त लाच अगर इतर बाबींची मागणी करत असेल, तर लाचलुचपत प्रतिबंधक विभागाशी संपर्क साधण्याचे आवाहन नागरिकांना करण्यात आले. तक्रारींसाठी शासकीय कार्यालयाच्या दर्शनी भागात फ्लेक्स बॅनर लावून जनजागृती करण्यात आली.