भोर, ता. ११ : खरीपाच्या पेरणीकरिता बियाणे खरेदी करण्यासाठी दुकानांमधील पॅकबंद बियाणांपेक्षा शेतकऱ्यांकडील खात्रीलायक बियाणे खरेदी करण्यासाठी ग्राहक पसंती देत आहेत. मंगळवारी (ता.११) भोर येथे आठवडे बाजारात तालुक्याच्या ग्रामीण भागातील शेतकरी महिलांनी आपल्या शेतात देशी बियाणांचे उत्पादन केलेले बियाणे विक्रीसाठी आणले.

यामध्ये भुईमूग (शेंगदाणे), गावरान वाटाणे, तीन प्रकारचे घेवडे, चवळी, हरभरे, पांढरे व काळे तीळ अशा प्रमुख पिकांच्या बियाणांचा समावेश आहे. शेतीसाठी सध्या खते व इतर साहित्याची खरेदी करावी लागते. त्यासाठी महिला शेतकरी घरातील कडधान्याचे बियाणे विकून पैसे उभे करतात आणि त्या पैशामधून खते व शेतीच्या इतर साहित्याची खरेदी करतात. यावेळी बाजारात किलोला सर्वाधिक २०० रुपये दर हा भुईमूग आणि वाटाण्याच्या बियाण्यांना होता. याशिवाय इतर सर्व प्रकारच्या बियाण्यांसाठी १०० ते १५० रुपये दर होता. खासगी कंपन्यांचे बियाण्यांची खात्रीही मिळत नाही. म्हणून ग्राहक बाजारातील शेतकऱ्यांच्या घरातील आपल्याच भागातील मातीमध्ये तयार खात्रीलायक बियाणे खरेदी करीत आहेत.