भोर, ता. ३ : भोरचे दिवंगत माजी आमदार संपतराव जेधे यांनी सुरू केलेल्या रायरेश्वर ते पंढरपूर पायी दिंडीचे बुधवारी (ता .३) सकाळी भोरहून पंढरपूरकडे प्रस्थान झाले. दिंडीचे हे ४६ वर्ष असून भोरमधील ही सर्वात पहिली आणि सर्वात मोठी दिंडी आहे. सोमवारी (ता. १) सकाळी रायरेश्वर किल्ल्यावरून निघालेल्या पायी दिंडीचा भोरमधील दुसरा मुक्काम संपल्यानंतर दिंडी मार्गस्थ झाली. संपतराव जेधे यांच्या भोरमधील घरासमोर दिंडीतील संत ज्ञानेश्वर माऊलींच्या पादुकांचे आणि रथाचे पूजन करण्यात आले. राजगड ज्ञानपीठच्या मानद सचिव स्वरूपा थोपटे आणि तहसीलदार सचिन पाटील यांच्या हस्ते माऊलींच्या पादुकांचे आणि रथाचे पूजन करण्यात आले. यावेळी दिंडीचे अध्यक्ष रामदास जेधे, उपाध्यक्ष प्रदीप शिंगारे, दिंडी प्रमुख नामदेव महाराज किंद्रे, बापू महाराज कंक, राजीव केळकर, गीतांजली शेटे, नंदा जाधव, नितीन जेधे, पंढरीनाथ भिलारे, विजय गोळे, डॉ. सुरेश गोरेगावकर, डॉ. आनंदा कंक, डॉ. अण्णासाहेब बिराजदार उपस्थित होते.
दिंडी प्रमुखांच्या वतीने चौपाटी येथील छत्रपती शिवरायांच्या अश्‍वारूढ पुतळ्याला पुष्पहार अर्पण करण्यात आला. संजय गोळे, सुनील गोळे यांच्या वतीने वारीतील सर्व भाविकांना अल्पोपहार देण्यात आला.
नॅशनल इंटिग्रेटेड मेडिकल असोसिएशन भोर शाखा व भोर तालुका डॉक्टर असोसिएशन यांच्या वतीने वारकऱ्यांच्या हस्ते दिंडी मार्गावर वृक्षारोपण करण्यात आले. भोर तालुका केमिस्ट असोसिएशन, तालुका पत्रकार संघ आणि ग्रामीण रुग्णालयाच्या वतीने सर्व भाविकांना अत्यावश्यक औषधांचे किट वाटप करण्यात आले.