भोर, ता. ७ : शहराजवळील शिरवलीतर्फे भोर, पोंबर्डी, वेनवडी, आंबेघर आणि पिसावरे परिसरातील शेतांमध्ये पेरणी केलेल्या शेतांमध्ये रानडुक्करांनी धुमाकूळ घालून शेत उकरून बियाणे खाऊन टाकले आहेत. यामुळे शेतकऱ्यांवर दुबार पेरणीची वेळ आली आहे.

बियाणे उगवून येण्यापूर्वीच ते नष्ट झाल्यामुळे शासनाकड़ून किंवा वन विभागाकडून कोणत्याही प्रकारची नुकसानभरपाई मिळत नाही. त्यामुळे शेतकरी हवालदिल झाले असून रानडुक्करांपासून शेतीचे रक्षण कशा प्रकारे करावे यासाठी शेतकरी प्रयत्न करीत आहेत. शिरवली तर्फे भोर गावातील समाधान चौधरी, लक्ष्मण कुडले, रामचंद्र झांजले, सतीश गिरे, रामचंद्र चव्हाण, कांता गिरे आणि उत्तम गिरे यांच्यासह इतर शेतकऱ्यांनी पेरलेले बियाणे रानडुक्करांनी नष्ट केले आहे.
भोरच्या परिरसात रात्रीच्या वेळी रानडुक्करे खाण्यापिण्यासाठी झुंडीने सर्वत्र फिरत असतात. पेरणी केलेल्या शेत उकरून नांगरल्यासारखे करतात. त्यामुळे बियाणे उगवून येण्याअगोदरच नष्ट केले जात आहेत. रानडुक्करांचा बंदोबस्त करण्यासाठी काही शेतकऱ्यांनी कुत्रे भुंकलेल्या आवाजाचे रेकॉर्डिंग रात्रभर शेताच्या बांधावर वाजवित आहेत. त्यामुळे रानडुक्करांचा प्रादुर्भाव काही प्रमाणात कमी होत आहे. परंतु कुत्र्याच्या भुंकण्याच्या आवाजाचे रेकॉर्डिंग आणि स्पिकरचा खर्चही जास्त आहे. त्यामुळे सर्वच शेतकऱ्यांना ते वापरणे शक्य होत नाही. याबाबत भोर वन विभागाचे वनपरिक्षेत्र अधिकारी शिवाजी राऊत यांच्याशी संपर्क साधला असता पेरलेले बियाणे उगवून येण्यापूर्वीच जर वन्य प्राण्यांमुळे नष्ट झाले तर वन विभागाकडून कोणतीही मदत मिळत नसल्याचे सांगितले.

भुईमूगाचे बियाणे शनिवारी दुपारी पेरले आणि संध्याकाळपर्यंत वाफे तयार केले. मात्र रविवारी सकाळी शेतात गेलो तर रानडुक्करांनी संपूर्ण शेत नांगरल्यासारखे उकरून टाकले. त्यामुळे बियाणांचा आणि पेरणीचा खर्च वाया गेला आहे. आता दुबार पेरणी करावी लागणार आहे.
- समाधान चौधरी, शेतकरी शिरवलीतर्फे भोर.

04756