भोर, ता. ३० : पुणे-कापूरव्होळ-भोर मार्गावरील कासुर्डी गुमा (ता.भोर) येथील पुलाच्या कठड्याला लागून असलेले धोकादायक फलकामुळे अपघाताची शक्यता निर्माण झाली आहे. पुलाच्या भिंतीला लागून असलेले धोकादायक होर्डिंग हटविण्याची मागणी केली जात आहे.
भोर-कापूरव्होळ मार्गावरील कापूरव्होळ फाटा ते कासुर्डी गुमा दरम्यान अनेक मोठमोठे होर्डिंग उभे करण्यात आले आहेत. कासुर्डी गुमा येथील पुलाच्या दक्षिणेकडील टोकाला पुलाच्या भिंतीला लागून दोन्ही बाजूला दोन होर्डिंग उभारण्यात आलेले आहेत. यावर मोठ्या प्रमाणात रंगीबेरंगी जाहिराती केल्या जात आहेत. मात्र पुलाच्या दोन्ही कडेला वळणे असल्यामुळे आणि होर्डिंगवरील जाहिरातीमुळे वाहनचालकांचे लक्ष विचलीत होत असल्यामुळे अपघात होण्याची शक्यता निर्माण झाली आहे. त्या ठिकाणी दुचाकींचे छोटे-छोटे अपघात झालेले आहेत. यासाठी शासनाने धोकादायक होर्डिंग हटवावेत अशी मागणी वाहनचालकांनी केली आहे. याबाबत सार्वजनिक बांधकाम विभागाचे शाखा अभियंता योगेश मेटेकर यांच्याशी संपर्क साधला असता त्यांनी सांगितले की, ‘संबंधित होर्डिंगच्या मालकाला यापूर्वी नोटीस दिलेली आहे. आता पुन्हा निर्धारित कालावधीत होर्डिंग हटविण्यासाठी नोटीस देण्यात येणार आहे. तरीदेखील होर्डिंग न हटविल्यास पोलिस बंदोबस्तात होर्डिंग काढून टाकण्यात येतील.’