भोर, ता. १० : भोर तालुक्यातील शेतकऱ्यांना यावर्षीच्या खरीप हंगामासाठी पुणे जिल्हा मध्यवर्ती सहकारी बॅंकेमार्फत पीक कर्ज वाटपास सुरुवात झाली. येथील पुणे जिल्हा मध्यवर्ती सहकारी बँकेच्या चौपाटी परिसरातील शाखा क्रमांक दोनच्या सभागृहात मंगळवारी (ता.८) सायंकाळी या पीककर्ज वाटपाचा प्रारंभ करण्यात आला.
बँकेचे तज्ज्ञ संचालक भालचंद्र जगताप यांच्या हस्ते तालुक्यातील वेळवंड आणि वडगाव डाळ येथील शेतकऱ्यांना पीककर्जाचे वाटप केले. वडगाव डाळ येथील शेतकरी हनुमंत डाळ व वेळवंड येथील विष्णू राजीवडे या दोन शेतकऱ्यांना प्रातिनिधिक स्वरूपात त्यांच्या पीक कर्जाचे धनादेश देण्यात आले.
यावेळी पीडीसीसी बॅंकचे शाखाधिकारी बाळासाहेब चव्हाण, विकास अधिकारी निखिल खोपडे, महेश बोबडे, वडगाव डाळ सोसायटीचे सचिव प्रकाश पाटणे, अध्यक्ष भगवान जामदार, वेळवंड सोसायटीचे अध्यक्ष पंढरीनाथ राजीवडे, सचिव सनी धुमाळ, न्हावी विकास सोसायटीचे अध्यक्ष अंकुश चव्हाण, सीताराम बैलकर, किसन पांगुळ, दत्तात्रेय मोरे आदींसह शेतकरी उपस्थित होते.
वडगाव डाळ येथील पहिल्या टप्प्यातील ८२ शेतकरी सभासदांना ८८ लाख ९४ हजार तर वेळवंडच्या २५ शेतकरी सभासदांना ६० लाख रुपयांच्या पीक कर्जाचे वाटप यावेळी करण्यात आले. भालचंद्र जगताप म्हणाले, बँकेतून शेतकऱ्यांना सर्व प्रकारचे सहकार्य मिळेल, शेतकऱ्यांनीही बँकेच्या अत्याधुनिक सोयी सुविधांचा फायदा घ्यावा. असे सांगत शेतकऱ्यांनी पीक कर्जांचा भरणा हा पीडीसीसी बँकेच्या शाखेंमधूनच करावा, असे आवाहन केले.