भोर, ता. २७: पिसाळलेला कुत्रा चावल्यामुळे शहरातील दहा जण जखमी झाले. सोमवारी (ता .२६) सायंकाळी शहरात एक पिसाळलेला कुत्रा फिरत होता. त्याने श्रीपतीनगर, नवीआळी व वेताळ पेठ या भागातील रस्त्यावरून जाणाऱ्या सहा नागरिकांना चावा घेतला. पिसाळलेला कुत्रा कोणताही आवाज न करता जवळ येऊन नागरिकांच्या पायाला किंवा हाताला चावा घेत होता. चावा घेतल्यानंतर तो लगेच पळून जात होता. त्यामुळे त्याला पकडता आले नाही. मंगळवारी (ता.२८) सकाळपासूनच त्या कुत्र्याने चौपाटी परिसरात धिंगाणा घातला. कुत्र्याने चावलेल्या सर्वांनी भोरच्या उपजिल्हा रुग्णालयात उपचार घेतले. दरम्यान, मंगळवारी सायंकाळी साडेचारच्या सुमारास श्रीपतीनगरमधील एका बंगल्याच्या पार्किंगमध्ये कुत्रा शिरला. संबंधित व्यक्तींनी पार्किंगचे दरवाजे बंद करून त्यास कोंडून ठेवले. नगरपालिकेच्या आरोग्य विभागाचे प्रमुख महिंद्र बांदल यांच्या मार्गदर्शनाखाली ऋषिकेश शेटे, दत्ता जगताप, नाना वाघोले, सागर पवार, बाबू माने व दत्ता पवार या कर्मचाऱ्यांनी एका तासाच्या प्रयत्नानंतर त्या कुत्र्यास जरबंद केले.