भोर, ता. ६ः भोर-कापूरहोळ मार्गावरील इंगवली (ता.भोर) येथील खंडोबाचा माळ परिसरातील निसर्गरम्य नेकलेस पॉइंटचा परिसर पर्यटकांनी फुलून गेला होता. नेकलेस पॉइंटवर रविवारी सकाळपासून झालेली गर्दी सायंकाळी उशिरापर्यंत सुरूच होती. उन-पावसाच्या वातावरणात अंगावर पावसाच्या रिमझीम सरी घेऊन पर्यटक कुटुंबासह वर्षाविहाराचा आनंद घेत होते. स्थानिक नागरिकांनी गरमागरम मक्याचे कणीस, भुईमुगाच्या शेंगा, चहा व इतर पदार्थांची विक्री केल्यामुळे पर्यटकांच्या आनंदात अधिकच भर पडली. काही पर्यटक निसरड्या धोक्याच्या ठिकाणी सेल्फी काढण्याचा प्रयत्न करीत होते. शहरातील काही हौशी मद्यपी पर्यटक मोठमोठ्याने आवाज करताना दिसत होते. परंतु कोणताही गैरप्रकार घडला नाही. पर्यटकांनी रस्त्यावर वाहने पार्क केल्यामुळे काही वेळा वाहतुकीचा खोळंबा झाला. नेकलेस पॉइंटवर गर्दी होत असल्याची जाणीव असूनही प्रशासनाने तिथे कोणतेही फलक लावलेले नाहीत. शिवाय त्या ठिकाणी सुट्टीच्या दिवशी तरी पोलिस बंदोबस्त असायला हवा. अशी अपेक्षा फॅमिलीसह आलेल्या शहरातील व्यक्तींनी केली.