भोर, ता. १६ : बारे ब्रद्रुक (ता. भोर) येथे पुण्यातील ऑल इंडिया श्री शिवाजी मेमोरिअल सोसायटीच्या कॉलेज ऑफ इंजिनिअरिंगच्या राष्ट्रीय सेवा योजनेच्या विद्यार्थ्यांनी दिवसभर भातलावणी करून भातशेतीची माहिती करून घेतली.
महाविद्यालयातील राष्ट्रीय सेवा योजनेच्या एक दिवस बळीराजासाठी या सामाजिक उपक्रमाअंतर्गत ही भातलावणी करण्यात आली. रविवारी (ता.१३) दिवसभर बारे ब्रुद्रुकमधील शेतकरी दशरथ सीताराम दानवले यांच्या भातखाचरात भाताच्या रोपांची लागवड केली. महाविद्यालयाचे प्राचार्य डॉ. डी. एस बोरमाने यांच्या मार्गदर्शनाखाली राष्ट्रीय सेवा योजनेचे समन्वयक व कार्यक्रम अधिकारी डॉ. नाना शेजवळ यांच्यासह १४ विद्यार्थी या उपक्रमात सहभागी झाले.
विद्यार्थ्यांनी भातशेतीमधील भाताच्या रोपांची पेरणी, पेरणीपाश्चात घ्यावयाचा काळजी, भातरोपांची काढणी, भातलावणी, भातकाढणी व भातमळणी आदींबाबत शेतकऱ्यांकडून माहिती घेतली. दिवसभरात विद्यार्थ्यांनी भाताच्या रोपांची काढणी करणे, बांधणी करणे, वाहतूक करणे, भात खाचरात चिखल करणे, बैलांच्या मदतीने मशागत करणे, भाताच्या रोपांची सरळ रेषेतील लागवड करणे आदी आदी कामे केली. तसेच बांधावर बसून जेवणाचाही आस्वाद घेतला.
महाविद्यालयातील शिवाजी माने, भक्ती घाडगे, साक्षी विभूते, शुभम गोरे, प्रज्वलित ससाने, ओमकार चव्हाण, श्रीनाथ वाटणवर, श्रेया बोडा, दीक्षा बुधवणकर, सूर्या शिंदे, ऋतिक वाळुंजकर, स्वप्नील पवार, किरण तोंडचोरे व प्रतीक दानवले या विद्यार्थ्यांनी या उपक्रमाचे नियोजन केले.

05469