भोर, ता. २५ : येथील राजा रघुनाथराव विद्यालयात आयोजित स्काउट गाइड पथक नोंदणी व उजळणी वर्गात स्काउट गाइड तसेच ‘कब बुलबुल’च्या अभ्यासक्रमाविषयी माहिती देण्यात आली. पुणे भारत स्काउट गाइड जिल्हा कार्यालय, जिल्हा परिषदेचा प्राथमिक व माध्यमिक विभाग आणि पंचायत समिती भोर यांच्या वतीने सोमवारी हा एकदिवसीय वर्ग पार पडला.
गाइडच्या सहाय्यक जिल्हा आयुक्त विजया पाटील यांच्या अध्यक्षतेखाली झालेल्या या कार्यक्रमासाठी पंचायत समितीचे विषयतज्ज्ञ सुनील गोरड, उपमुख्याध्यापक वसंत गायकवाड, पर्यवेक्षिका नीलिमा मोरे, सोमनाथ कुंभार, केशव पवळे व राज्य प्रशिक्षण केंद्र रामबागचे केंद्रप्रमुख उमेश मिसाळ उपस्थित होते.
या उजळणी वर्गात पंचायत समितीच्या विषयतज्ज्ञ लता वाघोले, स्काउट गाइडचे पुणे जिल्हा संघटक उषा हिवराळे, सहाय्यक जिल्हा चिटणीस मीनल जाधव, जिल्हा प्रशिक्षण समुपदेशक कृष्णा तामकर, संजय खरमरे, रेणुका खरमरे, संतोष मादगुडे व उमेश मिसाळ आदींनी विद्यार्थ्यांना मार्गदर्शन केले. स्काउट गाइड, ‘कब बुलबुल’ या अभ्यासक्रमासोबत स्काउट गाइड गणवेश, समुदाय विकास कार्यक्रम, आपत्कालीन व्यवस्थापन, प्रथमोपचार, स्ट्रेचर, हिरक पंख, सुवर्णबाण, राज्य पुरस्कार आदींबाबत सखोल मार्गदर्शन करण्यात आले. विद्यालयातील गाइड शिक्षिका वंदना किर्वे व स्काउट शिक्षक सिद्धनाथ पर्वते यांनी कार्यक्रमाचे नियोजन केले होते.