भोर, ता. २७ : तालुक्यातील ब्रिटिशकालीन भाटघर धरण १०० टक्के भरल्याने धरणातून पाण्याचा विसर्ग मोठ्या प्रमाणात होत आहे. धरणाच्या दरवाजांमधून फेसाळत पडणाऱ्या पांढऱ्याशुभ्र पाण्याचे छायाचित्र काढण्यासाठी धरणाच्या भिंतीच्या खालच्या बाजूला पर्यटकांची गर्दी होत आहे. पर्यटकांना भाटघर धरणावर जाण्यास बंदी असल्यामुळे पर्यटक धरणाच्या पडणाऱ्या पाण्याचे फोटो आणि सेल्फी काढून आपली हौस पूर्ण करीत आहेत. रविवारी साप्ताहिक सुट्टी असल्यामुळे आणि दिवसभर रिमझीम पाऊस सुरु असल्यामुळे शहरातील हौशी पर्यटक भोर परिसरात आले. पर्यटकांच्या वाहनांमुळे रस्ते आणि पर्यटकांमुळे तालुक्यातील सर्वच पर्यटनस्थळांवर गर्दी होती. भाटघर धरणाच्या जवळील रस्त्यावर आणि नेकलेक पॉईंटजवळ पर्यटकांनी वाहने रस्त्यावर उभी केली. त्यामुळे इतर प्रवाशांना या रस्त्यावर काही वेळा ट्रॅफिक जॅमचा सामना करावा लागला. रविवारी सकाळपासून सुरू झालेली पर्यटकांची गर्दी सायंकाळी उशिरापर्यंत सुरू होती.
भाटघर धरणात ९५ टक्के पाणीसाठा झाल्याने शनिवारी (ता. २६) सकाळी धरणावरील वीजनिर्मिती केंद्रातून १ हजार ६३१ क्यूसेकने पाणी सोडण्यास सुरुवात करण्यात आली. सायंकाळी धरणाच्या दरवाजांमधून ४ हजार क्यूसेकने पाण्याचा विसर्ग सुरु केला. तालुक्यातील नीरा-देवघर धरणाच्या वीजनिर्मिती केंद्रातून आणि सांडव्यातून ४ हजार १३० क्यूसेकने पाण्याचा विसर्ग सुरु आहे. याशिवाय राजगड तालुक्यातील गुंजवणी धरणाच्या वीजनिर्मिती केंद्रातून २५० क्यूसेकने पाण्याचा विसर्ग सुरु आहे. या तीनही धरणातून पडणारे पाणी हे वीर धरणात जात असल्याने वीर धरणातूनही पाण्याचा विसर्ग मोठ्या प्रमाणात सुरु आहे.

भोरला पावसाळी पर्यटनाला आलेल्या पर्यटकांनी आपली वाहने वाहतुकीस अडथळा निर्माण होईल अशा प्रकारे पार्क करू नयेत. आणि कुटुंबासह फिरायला आलेल्या व्यक्तींना त्रास देवू नये. अन्यथा पोलिसांच्या कारवाईस सामोरे जावे लागेल.
अण्णासाहेब पवार, पोलिस निरीक्षक भोर.