भोर, ता. ४ : नीरा धरण साखळीतील भाटघर व नीरा-देवघर धरणांसह राजगड तालुक्यातील गुंजवणी आणि पुरंदर तालुक्यातील वीर धरणातून पाण्याचा विसर्ग सोमवारी (ता.४) सकाळी पूर्णपणे थांबविण्यात आला. मागील तीन-चार दिवसांपासून पावसाचे प्रमाण कमी झाल्याने धरणात येणारे पाणीही कमी झालेले असल्यामुळे जलसंपदा विभागाने हा निर्णय घेतला.
जुलै महिन्याच्या शेवटच्या आठवड्यात पावसाचा जोर वाढल्यामुळे भाटघर आणि नीरा देवघर धरणे भरण्याच्या मार्गावर होती. त्यामुळे २७ जुलैला भाटघरमधून आणि २८ जुलैला नीरा-देवघरमधून पाणी सोडण्यात आले. भाटघर धरणाच्या वीजनिर्मिती केंद्रातून आणि दरवाजांमधून पाणी सोडण्यास सुरुवात केली. नीरा देवघर धरणावरील वीजनिर्मिती केंद्राचे काम सुरू असल्यामुळे धरणाच्या सांडव्यातून पाण्याचा विसर्ग सुरू होता. तर गुंजवणी धरणाच्या वीजनिर्मिती केंद्रातून पाण्याचा विसर्ग सुरु होता. तीनही धरणांमधील पाणी हे वीर धरणात जात असल्यामुळे वीर धरणाच्या कालव्यातून आणि दरवाजांमधून विसर्ग सुरू होता.
पाऊस कमी झाल्यामुळे ३१ जुलैला नीरा-देवघर धरणातून पाण्याचा विसर्ग बंद केला. भाटघर आणि गुंजवणी धरणाच्या दरवाजांमधून होणारा पाण्याचा विसर्ग शनिवारी (ता.२) बंद करण्यात आला. गुंजवणी धरणाच्या वीजनिर्मिती केंद्रातून २५० क्यूसेकने होणारा विसर्ग रविवारी (ता.३) बंद करण्यात आला.

धरण १०० टक्के भरल्यावर पुन्हा विसर्ग
भाटघर धरणाच्या वीजनिर्मिती केंद्रातून १ हजार ६३१ क्यूसेकने होणारा विसर्गही सोमवारी (ता.४) सकाळी थांबविण्यात आला. धरणात येणाऱ्या पाणीसाठ्यात वाढ होऊन धरणे १०० टक्के भरल्यानंतर धरणांमधून पाण्याचा विसर्ग पुन्हा सुरू करण्यात येणार असल्याचे जलसंपदा विभागाकडून सांगण्यात आले. भाटघर धरणातून पाण्याचा विसर्ग पूर्णपणे बंद केला असला तरीही धरणाच्या दरवाज्यांच्या फटीमधून पडणाऱ्या पाण्याचा आवाज आणि मनमोहन दृश्य पाहण्यासाठी पर्यटकांची गर्दी होत आहे.

05572