भोर, ता. १० : भाटघर धरण खोऱ्यातील पसुरे (ता. भोर) येथे मंगळवारी (ता. ९) रात्री पुन्हा एकदा दोन बिबट्याचे दर्शन झाले. त्यामुळे पसुरे गावासह इतर गावात भितीचे वातावरण निर्माण झाले आहे.
पसुरे येथील खोपडे वाडीच्या पायथ्याजवळ असलेल्या वाकडा आंबा परिसरात मंगळवारी रात्री शेतकरी रामदास कांबळे यांना बिबट्याची जोडी दिसली. त्यांनी लगेच ग्रामस्थांना माहिती दिली. त्यामुळे ग्रामस्थ आणि तरुणांनी गावात गस्त घालून नागरिकांना सावध केले. पसुरे येथील तंटामुक्त समितीचे अध्यक्ष मनोज धुमाळ यांनी सोशल मीडियाच्या माध्यमातून नागरिकांना सतर्क राहण्याचे आवाहन केले. वन विभागाने बिबट्याचा बंदोबस्त करावा, अशी मागणी केली जात आहे. रात्री-अपरात्री एकट्याने फिरणे टाळा, हातात मोबाइल, काठी असे असू द्यावी, जनावरे सुरक्षित स्थळी बांधावी, लहान मुले यांची काळजी घ्यावी, घराच्या दारात लाइट चालू असू द्या, अशा मार्गदर्शक सूचना समाज माध्यमांवरून पाठविल्या जात आहेत.