भोर, ता. १९ : जिल्हा परिषद व पंचायत समितीच्या निवडणुकीसाठी अर्ज दाखल करण्याच्या चौथ्या दिवशी भोर तालुक्यात सोमवारी (ता. १९) जिल्हा परिषदेसाठी आणि पंचायत समितीसाठी प्रत्येकी दोन, अशा एकूण केवळ चार उमेदवारांनी आपले उमेदवारी अर्ज दाखल केले. शुक्रवारी (ता. १६) उमेदवारी अर्ज दाखल करण्यास सुरुवात झाली असली तरीही शुक्रवारी आणि शनिवारी एकही उमेदवारी अर्ज दाखल झाला नाही. सोमवारी प्रथमच चार अर्ज दाखल झाले. मात्र, सोमवारपर्यंत १२६ इच्छुक उमेदवारांनी अर्ज नेले आहेत. यामध्ये जिल्हा परिषदेसाठी ५३ इच्छुक उमेदवारांच्या ९४ अर्जांचा आणि पंचायत समितीसाठी ७३ उमेदवारांच्या १२२ अर्जांचा समावेश आहे, अशी माहिती निवडणूक निर्णय अधिकारी तथा प्रांताधिकारी डॉ. विकास खरात आणि साहाय्यक निवडणूक निर्णय अधिकारी तहसीलदार राजेंद्र नजन यांनी दिली.
सोमवारी शिवसेना उद्धव बाळासाहेब ठाकरे पक्षाच्या तीन आणि एका अपक्ष उमेदवारांनी अर्ज दाखल केला आहे. जिल्हा परिषदेसाठी भोंगवली- कामथडी गटासाठी सर्वाधिक २८ अर्ज आणि पंचायत समितीच्या भोलावडे गणासाठी सर्वाधिक २३ उमेदवारांनी अर्ज नेले आहेत. अर्ज घेऊन गेलेल्या उमेदवारांची संख्या पुढीलप्रमाणे : गट : वेळू- नसरापूर (२७), भोंगवली- कामथडी (२८), शिंद- भोलावडे (२०), कारी- उत्रौली (१९). गण : वेळू (१३), नसरापूर (१८), भोंगवली (१८), कामथडी (१९), भोलावडे (२३), शिंद (१३), उत्रौली (१४), कारी (४).