भोर, ता. ४ : नसरापूर येथील चार वर्षांच्या चिमुरडीवर बलात्कार करून खून करणाऱ्या भीमराव कांबळे याला कठोर शिक्षा करा, त्याला फाशी द्या किंवा ठेचून मारा, अशी संतप्त प्रतिक्रिया आरोपीच्या पत्नीने आणि मुलाने सोमवारी येथे व्यक्त केली.
नसरापूर (ता. भोर) येथे शुक्रवारी (ता. १) घडलेल्या या घटनेचे राज्यभर पडसाद उमटले आहेत. या पार्श्वभूमीवर, गेल्या अनेक वर्षांपासून आरोपीपासून वेगळे राहणाऱ्या त्याच्या कुटुंबीयांनी माध्यमांसमोर आपली भूमिका मांडली. आरोपीच्या पत्नीने सांगितले की, ‘२०१५ पासून आमचा त्याच्याशी कोणताही संबंध नाही. मला त्याचे तोंडही पाहायचे नाही, त्याची विल्हेवाट तिकडेच लावा.’
आरोपीच्या मुलानेही तीव्र संताप व्यक्त करत म्हटले, ‘मला त्याची वडील म्हणून ओळख सांगण्याची लाज वाटते. त्याला माझ्यासमोर आणले तर मीच त्याला फाशी देईन. त्या चिमुरडीला न्याय मिळालाच पाहिजे. मात्र, त्याच्या कृत्याची शिक्षा आम्हाला देऊ नका, आम्हाला आमचे भविष्य जगायचे आहे.’