भोर, ता. २३ : शहरातील श्रीमंत गंगूताई पंतसचिव वाचनालयाच्या सभागृहात गुरुवारी (ता. २७) ‘मावळ रानभाज्या महोत्सवाचे’ आयोजन केले आहे. सकाळी ११ ते सायंकाळी ४ या वेळेत होणाऱ्या या महोत्सवात भोरच्या मावळ भागातील बचत गटांमधील महिला विविध प्रकारच्या रानभाज्यांचे प्रदर्शन, पारंपरिक पद्धतीने तयार केलेल्या रानभाज्यांच्या पाककृतींचे सादरीकरण तसेच रानभाज्यांपासून तयार करण्यात येणाऱ्या विविध खाद्यपदार्थांची माहिती देणार आहेत. येथील राजगड ज्ञानपीठाच्या अनंतराव थोपटे महाविद्यालयाच्या वतीने या उपक्रमाचे आयोजन करण्यात आले असून राजगड ज्ञानपीठाच्या सचिव व जिल्हा परिषद सदस्या स्वरूपा थोपटे यांच्या हस्ते या महोत्सवाचे उद्‍घाटन होणार आहे.
महोत्सवात विविध रानभाज्यांची ओळख, त्यांचे पौष्टिक व औषधी गुणधर्म, पारंपारिक पाककृती आणि स्थानिक जैवविविधतेचे महत्त्व याबाबतचा शास्त्रोक्त माहिती देण्यात येणार आहे. या महोत्सवातून महिला सक्षमीकरण आणि ग्रामीण अर्थव्यवस्थेला चालना देण्याचा प्रयत्न करण्यात येणार आहे असल्याचे महाविद्यालयाचे प्राचार्य डॉ. महादेव डोंगरे यांनी सांगितले. महाविद्यालयातील वनस्पतिशास्त्र विभागप्रमुख डॉ.वर्षा कोरे व डॉ.मयुरा दुधाणे या महोत्सवाचे समन्वयक म्हणून काम पाहणार आहेत.