बारामती, ता. ३० : ‘‘मी जे काम हातात घेते, ते पूर्णत्वाला नेते. केंद्र व राज्य सरकारच्या निधीच्या माध्यमातून बारामती लोकसभा मतदारसंघातील समस्या सोडवण्याचा मी मनापासून प्रयत्न करेन. केंद्रामध्ये पंतप्रधान नरेंद्र मोदी यांच्या नेतृत्वाखालील सरकार तिसऱ्यांदा सत्तेत येणार असल्यामुळे केंद्र सरकारच्या निधीच्या माध्यमातून या तालुक्यातील पाण्याचा प्रश्न कायमस्वरूपी सोडवण्यास आपण प्राधान्य देणार आहे,’’ अशी ग्वाही बारामती लोकसभा मतदारसंघातील राष्ट्रवादी कॉंग्रेसच्या उमेदवार सुनेत्रा पवार यांनी दिली.
मंगळवारी (ता. ३०) बारामती तालुक्यातील सावंतवाडी, उंडवडी कप, जराडवाडी, सोनवडी सुपे, अंजनगाव, खराडवाडी, उंडवडी सुपे, कारखेल, देऊळगाव रसाळ, सोनपीरवाडी या ठिकाणी सुनेत्रा पवार यांनी गाव सभा घेतल्या. त्यावेळी त्या बोलत होत्या. त्या म्हणाल्या, ‘‘केंद्र व राज्यांमध्ये एकाच विचाराचे सरकार असेल तर विकास अधिक गतीने होतो, ही बाब विचारात घेऊन मतदारांनी महायुतीच्या उमेदवाराच्या पाठीशी आपली ताकद उभी करावी.’’