बारामती, ता. ३० : चारित्र्याच्या संशयावरून पेटवून देत महिलेचा खून केल्याप्रकरणी दोघांना अतिरिक्त जिल्हा व सत्र न्यायाधीश आर. के. देशपांडे यांनी जन्मठेपेची शिक्षा सुनावली.
सुनील सुरेश शिंदे (रा. भीमनगर, दौंड) व स्वरुपलाल ऊर्फ दुष्काळ्या मोकाशा काळे (रा. पांढरेवस्ती, कुरकुंभ, ता. दौंड) यांना जन्मठेपेची शिक्षा सुनावली. जानेवारी २०१९ रोजी सुनील सुरेश शिंदे, स्वरुपलाल ऊर्फ दुष्काळ्या मोकाशा काळे व फरारी असलेला आरोपी पांगारी सुनील शिंदे ऊर्फ पांगारी दुष्काळ्या काळे यांनी अनैतिक संबंध असल्याच्या संशयावरून पेटवून दिले होते. उपचारादरम्यान महिलेचा मृत्यू झाला. या प्रकरणी दौंड पोलिसांनी दोषारोपपत्र दाखल केले होते. सरकार पक्षातर्फे अतिरिक्त सरकारी अभियोक्ता श्रीकांत पोंदकुले यांनी महिलेचा मृत्युपूर्व जबाब व १९ साक्षीदारांच्या साक्षी नोंदविल्या. अनेक साक्षीदारांनी साक्षी फिरविल्या, तरीही भक्कम पुरावा सादर करून या खटल्यात आरोपींना जन्मठेपेची शिक्षा न्यायालयाने सुनावली.
अतिरिक्त सरकारी अभियोक्ता श्रीकांत पोंदकुले यांना कोर्ट पैरवी नलवडे, दौंड ठाण्याचे पोलिस निरीक्षक संतोष डोके यांच्या मार्गदर्शनाखाली कोर्टपैरवी अंमलदार आर. डी. जगताप यांनी सहकार्य केले.