बारामती, ता. १२ : तथागत भगवान गौतम बुद्धांची प्रतिवर्षी वैशाखी पौर्णिमेस बुद्ध जयंती साजरी केली जाते. यंदा (ता.२९) मे रोजी बुद्ध जयंती असल्याने व धम्माचा प्रसार होण्याच्या उद्देशाने भारतीय बौद्ध महासभेच्या पुणे शाखेअंतर्गत बारामती तालुका शाखा व तांदूळवाडी येथील धम्म ज्योती बुद्ध विहार यांच्यावतीने येत्या १५ ते २५ मे दरम्यान तांदूळवाडी (ता. बारामती) येथे दहा दिवसीय बौद्धाचार्य श्रामणेर प्रशिक्षण शिबिर आयोजित केले आहे.

(ता. १५) मे रोजी सायंकाळी पाच वाजता बारामती शाखेचे अध्यक्ष पुण्यशील लोंढे, पुणे शाखेचे अध्यक्ष अरुण सोनवणे, सचिव राजरतन थोरात, संघटक नामदेव शिंदे, सुभाष कांबळे, समता सैनिक यांच्या उपस्थितीत शिबिरास प्रारंभ होणार आहे. यावेळी पूज्य भंते बी. नाग घोफची व भंते संघपालजी महाथेरो हे शिबिरार्थींना मार्गदर्शन करणार असल्याची माहिती कचर शिंदे यांनी दिली.