बारामती, ता. १४ : एकट्या बारामती शहरात जवळपास ७० होर्डिंग्ज असून एकाही होर्डिंगला रीतसर परवानगी घेतली नसल्याची बाब आता पुढे आली आहे. मुख्याधिकारी महेश रोकडे यांनीही याला दुजोरा दिला आहे. याबाबत बारामती नगरपालिकेने सर्व होर्डिंगधारकांना आतापर्यंत दोन वेळा नोटीस दिल्या असल्याचेही त्यांनी नमूद केले.

खासगी मालमत्तेच्या ठिकाणी होर्डिंग्ज लावलेले असले तरी, संबंधित स्थानिक स्वराज्य संस्थेची परवानगी आवश्यक असते. बहुसंख्य होर्डिंग्जबाबत परवानगीच घेतलेली नसल्याची बाब पुढे आली आहे. बारामती नगरपालिकेने मध्यंतरी होर्डिंगच्या दराबाबत धोरण निश्चित केले, त्यानंतर हे दर चढे असून ते कमी करण्याची मागणी केली होती. प्रत्यक्षात मात्र नगरपालिकेने कोणालाही परवानगीच दिली नसल्याची बाब आता पुढे आली आहे.

अनेक वर्षे बेकायदा होर्डिंग उभारून त्यातून उत्पन्न प्राप्त केल्यानंतर आता नगरपालिकेने पूर्वलक्षी प्रभावाने यात वसुली करण्याची बाब लोक बोलून दाखवीत आहेत. बारामतीहून बाहेर जाणाऱ्या मोरगाव, फलटण, नीरा, इंदापूर, पाटस, भिगवण अशा सर्वच रस्त्यांवर मोठ्या संख्येने होर्डिंग्ज असून याचे स्ट्रक्चरल ऑडिट व त्याची कायदेशीर परवानगी तपासून घेण्याची मागणी होत आहे.

सुरक्षिततात गरजेची
अनेक होर्डिंग्ज महामार्गालगत असून वादळामुळे दुर्घटना घडल्यास रस्त्यावरून जाणाऱ्या वाहनचालकांच्या जिवावर बेतू शकते. इतक्या मोठ्या आकाराची होर्डिंग्ज अनेक ठिकाणी लावण्यात आली आहेत. याची कायदेशीर बाजू व सुरक्षितता दोन्हींची जबाबदारी निश्चित करण्यात यावी अशीही मागणी आहे.