बारामती, ता. २ : शहरातील महात्मा फुले साठवण तलावाजवळ गंजलेल्या अवस्थेतील पाच पिस्तूल सापडले.
कोणीतरी अज्ञात व्यक्तीने साठवण तलावाजवळ पाच पिस्तुले टाकून दिल्याची गोपनीय माहिती पोलिसांना मिळाल्यानंतर पोलिसांनी त्या ठिकाणी धाव घेतली. बारामती शहर पोलिस ठाण्याचे पोलिस निरीक्षक संतोष घोळवे व इतर अधिकाऱ्यांनी त्या ठिकाणी असलेली गंजलेल्या अवस्थेतील पाच पिस्तुले ताब्यात घेतली.
ही पिस्तुले नेमकी कोणी या ठिकाणी आणून टाकली व ही कोणाच्या मालकीची आहेत, याचा तपास पोलिसांनी सुरू केला आहे. मात्र, बारामतीसारख्या शांतताप्रिय शहरामध्ये अचानक एकाच वेळेस पाच पिस्तुले सापडण्याची ही घटना चिंताजनक असल्याची चर्चा नागरिकांमध्ये आहे.
बारामती शहरामध्ये गेल्या काही वर्षांमध्ये पोलिसांनी अनेक युवकांकडून बेकायदा गावठी कट्टे व पिस्तूल जप्त केलेले आहेत. मध्य प्रदेशमधून अतिशय कमी किमतीमध्ये सहजतेने ही शस्त्रे मिळत असल्याची पोलिसांची माहिती आहे. काही एजंट या परिसरात येऊन पिस्तुलांची विक्री देखील करतात, अशी माहिती पोलिसांकडे असून त्या दृष्टीने देखील तपास सुरू आहे.
शस्त्रे बाळगण्याविरुद्ध गोपनीय बातमीदारांमार्फत पोलिसांनी कारवाई सुरू केली आहे. मात्र, एकाच वेळेस गंजलेल्या अवस्थेतील पाच पिस्तुले कोणी या ठिकाणी आणून टाकून दिली असतील, या दृष्टीने पोलिसांनी बारकाईने तपास सुरू केला आहे. या घटनेला पोलिस विभागाने गांभीर्याने घेतले असून त्याचा सखोल तपास सुरू केल्याचे पोलिस सूत्रांनी सांगितले.