बारामती, ता. ९ : पत्नीला पळवून नेल्याचा राग मनात धरून ज्या युवकाने पत्नीला पळवून नेले आहे त्याच्या अल्पवयीन भावाचे अपहरण केल्याप्रकरणी बारामती शहर पोलिसांनी एकास अटक केली.
जोपर्यंत माझ्या पत्नीला आणून सोडत नाही, तोपर्यंत तुझ्या भावाला सोडणार नाही, अशी धमकी संबंधित युवकाने दिली होती. या प्रकरणी आठ जुलै रोजी बारामती शहर पोलिसात अपहणाची फिर्याद दाखल केली होती. त्यानंतर शहर पोलिसांनी तातडीने दोन पथके तयार करून तपास सुरु केला होता. वारंवार लोकेशन बदलून आरोपी हुलकावणी देण्याचा प्रयत्न करत होता. तांत्रिक विश्लेषणाद्वारे माग काढून सांगली जिल्ह्यातील खानापूर येथून आरोपीस ताब्यात घेऊन संबंधित अल्पवयीन मुलाची शिताफीने सुटका केली.
जिल्हा पोलिस अधीक्षक पंकज देशमुख, अतिरिक्त पोलिस अधीक्षक संजय जाधव, उपविभागीय पोलिस अधिकारी सुदर्शन राठोड, स्थानिक गुन्हे अन्वेषणचे पोलिस निरिक्षक अविनाश शिळीमकर, शहरचे पोलिस निरिक्षक संतोष घोळवे, सहाय्यक पोलिस निरीक्षक गजानन चेके व कुलदीप संकपाळ, फौजदार युवराज घोडके, पोलिस हवालदार यशवंत पवार, मोहंमद अंजर मोमीन, अंकुश दळवी यांनी ही कामगिरी पार पाडली.