बारामती, ता. ४ : ‘‘या पुढील काळात शाळेच्या बाहेर शालाबाह्य विद्यार्थी आढळल्यास त्यांच्यावर कडक कारवाई करण्यात येणार आहे, प्रत्येक शाळा व महाविद्यालयाने परिसरात सीसीटीव्ही कॅमेरे बसविण्यासह पोलिसांशी सातत्याने संपर्क ठेवावा,’’ असे आवाहन बारामतीचे अतिरिक्त पोलिस अधीक्षक गणेश बिरादार यांनी केले.
शहरातील महाविद्यालयात झालेल्या खुनाच्या घटनेनंतर आता पोलिस विभाग सतर्क झाला असून यासंदर्भात शाळा प्रमुखांशी सुसंवाद साधण्यात आला. शहरातील पंचायत समितीच्या सभागृहात अतिरिक्त पोलिस अधीक्षक बिरादार, उपविभागीय अधिकारी वैभव नावडकर, उपविभागीय पोलिस अधिकारी डॉ. सुदर्शन राठोड, तहसीलदार गणेश शिंदे यांनी माध्यमिक, महाविद्यालय, कोचिंग क्लासेस, वसतिगृह प्रमुखांशी चर्चा केली.
वैभव नावडकर म्हणाले,‘‘माजी संघटनांच्या विद्यार्थ्यांनी त्यांच्या यशोगाथा विद्यार्थ्यांपुढे मांडाव्यात. त्यापासून प्रेरित होऊन विद्यार्थ्यांनी चांगले भविष्य घडवावे.’’
या बैठकी, १४५ संस्थांचे प्राचार्य, मुख्याध्यापक व शिक्षक उपस्थित होते. सर्वांनी आपली मते मांडली. तसेच सातत्याने पोलिसांच्या संपर्कात राहण्याचे आश्वासन दिले.