बारामती, ता. १८ : पोलिस असल्याची बतावणी करून एका ज्येष्ठ नागरिकाकडील साडेतीन लाखांच्या सोन्याच्या अंगठ्या व गळ्यातील चेन, असा ऐवज दोन भामट्यांनी लंपास केला. सोमवारी (ता. १७) दुपारी चारच्या सुमारास धनेश सुझुकी शोरुमसमोर ही घटना घडली.
या प्रकरणी दिलीप बाबूराव जगदाळे (वय ६४, रा. सहयोगसोसायटी मागे, बारामती) यांनी बारामती शहर पोलिसात फिर्याद दिली आहे. जगदाळे हे सोमवारी आपल्या टायरच्या दुकानातून दुपारी चारच्या सुमारास घरी निघाले असता धनेश सुझुकी शोरुमसमोर मोटारसायकलवरुन आलेल्या दोन भामट्यांनी त्यांना थांबविले, ‘एका मुलावर चाकूचे वार झाले असून आम्ही वार करणाऱ्यांना शोधत आहोत, आम्ही पोलिस आहोत, तुम्ही हातात अंगठ्या घालून कशाला फिरता, त्या रुमालात घालून खिशात ठेवा,’ असे सांगत हातचलाखीने अंगठ्या व गळ्यातील चेन चोरुन नेली. जगदाळे यांनी घरी आल्यानंतर रुमाल बघितला असता त्यात दोन दगड निघाले.