बारामती, ता. २५ : मोबाईल दुकानात विक्री करून त्याचे पैसे संबंधित मालकांना न दिल्याने शहर पोलिसांनी सूरज हरिश्र्चंद्र तावरे (रा. माळेगाव, ता. बारामती) याच्याविरुद्ध गुन्हा दाखल केला आहे. या प्रकरणी सृजल टेलिकॉमचे निक्सन बेन्नी म्हात्रे (रा. नडेनगर कॉलनी, काळेवाडी, पिंपरी, पुणे) यांनी फिर्याद दिली आहे.
या फिर्यादीत नमूद केले आहे की, सूरज तावरे याच्याकडे सृजल टेलिकॉम कंपनीने बारामतीतील सिनेमा रोडवरील दुकानात विक्रीसाठी मोबाईल दिलेले होते. त्याने मार्च २०२४ मध्ये सहा लाखांचे आयफोन, तसेच सॅमसंग कंपनीचे फोन विकले. विक्रीच्या सॉफ्टवेअरमध्ये छेडछाड करत ग्राहकांची खोटी नावे व कर्ज खाते क्रमांक तयार करून सृजल टेलिकॉमची फसवणूक केली. सप्टेंबर महिन्यात हिशेब केल्यानंतर नऊ मोबाईलचे पैसे जमा झाले नाही. त्यानंतर कंपनीच्या मालकांनी स्टॉकची पडताळणी केली असता आयफोन, सॅमसंग, नोकीया, ओपो, विवो या सारख्या कंपन्यांच्या एकूण ८८ मोबाईलचा हिशेब लागत नव्हता. या मोबाईलची विक्री करून त्याचे पैसे कंपनीकडे जमा केलेले नसल्याचे निदर्शनास आले. या प्रकरणी एकूण ३७ लाख व दुकान सुरु करताना दिलेले दहा लाख, अशी एकूण ४७ लाखांची फसवणूक झाली आहे.