बारामती, ता. १८ : ‘‘नागरिकांना दिलासा देत गुन्हेगारीवर नियंत्रण मिळविण्यासाठी प्राधान्य देऊन अधिकाधिक लोकाभिमुख कामावर आपला भर असेल,’’ अशी ग्वाही पुणे जिल्हा पोलिस अधीक्षक संदीप गिल यांनी दिली.

बारामती शहर पोलिस ठाण्यात गिल यांनी माध्यमांशी संवाद साधला. पुणे जिल्हा पोलिस अधीक्षकपदाचा कार्यभार स्वीकारताच दुसऱ्याच दिवशी त्यांनी बारामतीत उपमुख्यमंत्री अजित पवार यांची सदिच्छा भेट घेतली. पवार यांनीही त्यांना काही महत्त्वाच्या सूचना या वेळी केल्या. त्यानंतर इंदापूर तालुक्यातील तीन पोलिस ठाण्यांना व त्या पाठोपाठ बारामती शहर पोलिस ठाण्याला भेटी देत त्यांनी पोलिस कर्मचारी व अधिकाऱ्यांशी थेट संवाद साधला. पोलिसांच्या अडचणींचा आढावा घेत मूलभूत सुविधा उपलब्ध करून देण्यासाठी कटिबद्ध असू अशी ग्वाहीही त्यांनी दिली. अतिरिक्त पोलिस अधीक्षक गणेश बिरादार, उपविभागीय पोलिस अधिकारी सुदर्शन राठोड, पोलिस निरिक्षक विलास नाळे, चंद्रशेखर यादव, वैशाली पाटील आदी उपस्थित होते.

गिल म्हणाले, बारामतीत सुरू असलेले शक्ती अभियान लवकरच संपूर्ण पुणे जिल्ह्यामध्ये राबवू. याला प्रतिसाद चांगला असून त्या मुळे महिलांविषयक गुन्ह्यांमध्ये घट झाली आहे. वाहतुकीचा प्रश्न सगळीकडेच जटिल बनला आहे. जिल्हाधिकारी व संबंधित प्रशासनास सोबत घेऊन या वर उपाययोजना कशा करता येतील, याचा प्रयत्न करू.
मालमत्ताविषयक गुन्हे उघडकीस येण्याची टक्केवारी अत्यल्प असल्याचे निदर्शनास आणून दिल्यानंतर या बाबत स्वतंत्र पथकांमार्फत तपासाला गती देऊ, असे त्यांनी नमूद केले.

बारामतीचा महत्वाकांक्षी सीसीटीव्ही कॅमेरा प्रकल्प आता निविदा स्तरावर असून दोन महिन्यात कॅमेरे बसविण्याचे काम सुरु होऊन सहा महिन्यात सर्व यंत्रणा कार्यान्वित होईल. या नंतर गुन्हेगारीवर अधिक नियंत्रण येईल.
- संदीप गिल, पोलिस अधीक्षक, पुणे ग्रामीण.